Dhelpra në pus
Dhelpra natën duke u sjellë
Ra në një pus të thellë.
Dha e mori por më kot,
Nga pusi nuk delte dot.
Një dhelpër tjetër kur e pa
Me qortim asaj i tha:
Duket kokën e ke bosh,
Ç’kërkove aty përposh ?!”
Duke u munduar që të dalë
I kthen tjetra këto fjalë:
“Këtu ku jam motra ime
Dua ndihmë, s’dua qortime !
Zjarri, uji edhe nderi
Zjarri, uji edhe nderi
Kishin bashkë një shoqatë.
Por ashtu e solli puna,
Do të ndaheshin një natë.
Foli zjarri: - Në se humbas,
Më gjeni pa u lodhur shumë
Shikoni para edhe pas,
Ku del tym atje jam unë.
- Edhe mua miqtë e mi,-
Foli uji gjithë gazim,-
Më gjeni me lehtësi
Atje ku ka gjelbërim.
- Me mua puna ndryshon,-
Tha nderi duke derdhur lot,-
Mos u lodhni të më kërkoni,
Po humba s’më gjeni dot !
Duart, këmbët dhe stomaku
Thanë duke protestuar
Këmbët dhe duart e një plaku:
- Tërë jetën kemi punuar
Vetëm që të mbushet barku.
Pas kësaj nuk vonuan,
E lanë bosh për disa ditë,
Por e dini se ç’pësuan?
U shterën krejt fuqitë.
- E shikoni,- tha stomaku,-
Mendjelehtësinë tuaj ?!
Ju s’lëvizni dot nga pragu
Po s’pata ushqim të bluaj !
Cmira, kopracia dhe fati
Një ditë tek po udhëtonin
Cmira bashk’ me kopracinë
Gati sa s’po fluturonin…
Takuan fatbardhësinë.
Edhe fati nuk e zgjati
U dha premtimin e tij:
- Kush e para do kërkojë
I jap një qyp me flori.
Të dytës që ka durim
Do t’i jap dy qypa plot.
Mbaroi rruga, si përfundim
Asnjëra nuk mori dot !
Një i urtë kohë më parë
E ka thënë një fjalë të artë:
“Babëzia dhe makutëria
Të lenë shpesh duarthatë !”
Bilbili dhe skifteri
Një ditë në muajin prill
Skifteri zuri një bilbil.
Duke u dridhur prej tmerrit
Bilbili i thotë skifterit:
- Unë jam këngëtar,
E kam zërin margaritar.
Këndoj bukur më dëgjo,
Do kënaqesh domosdo.
- E kuptoj atë që thua,
Muzikën dhe unë e dua,
Por…më ndje bukurosh,
S’e dëgjoj me barkun bosh !