Miresevini ne ALBPOEM.COM

Dheu im

Aty kam qejf të kthehem
Ndonëse s'më pret qejfi
Në dheun tim të prehem
Në dheun prej vërteti.

Dhe kur më pluhuros
Ja njoh erën e thatë
Pale kur më baltos
E ndjej në trup të gjallë.

Kështu u rritëm bashkë
Si çamarokë mëhalle
Unë shpirtin tim i dhashë
Ai krenarinë shqiptare.

Dhe kur penguar eca
Dhe kur këmbët gërvishta
Më trim veten e ndjeva
Pa të kllëngjo do isha!

KORÇA IME

Në s'më mbajte dot moj Korçë
Unë të morra pas me vete
S'ma ndryshoi dot kjo botë
Korçarllëkun nëpër deje.

Korça ime, dhimbja ime
Ëndërr lënë në mes të udhës
Shpresë prerë nëpër vite
S'të harroj kurrën e kurrës!

Ti askujt fajin s'ja pate
Të tjerë patën për ty faj
Pak shtëpi mbushën me halle?
Pak shëmtuan çdo sokak?

Pak të prekën bukurinë?
Pak të plakën para kohe?
Pak degdisën nusërinë
Ndër të huaj, shërbëtore?

Pak t'i vranë serenatat?
Pak kulturën syrgjynosën?
Në liri t'i vunë prangat
Në të gjallë të varrosën!

Pak të zhvatën, të rrëmbyen
Lakuriq të lanë në rrugë
Dhe paturpësisht u kthyen
Më të ndershëm se një kurvë!?

Pak.....
Pak.....

Lermë aman, mos them akoma
Se akoma kam ç'të them
Ti për mua mbetesh, KORÇA
Ata "Pak", shkofshin në ferr!!!

Poezi, moj!

Je vazhdimësi e çasteve
Apo çast vazhdimësie
Je vetë magjia e fjalëve
Apo fjalë e një magjie?

Je e folura e syrit
Apo syri i të folurës
I jep Botës gjuhën e Hyjit
Apo Hyjit, gjuhën e Botës?


Sa kam qejf!

Sa kam qejf të përkëdhelem
Në kët' moshë të burrëris
Dhe në prehrin tënd të prehem
Të vazhdoj atë ç'kam nis...

Sa kam qejf të ri hutuar
Në kët' moshë të pjekuris
Dhe në trupin tënd zbuluar
Të mos di se nga t'ja nis...

Sa kam qejf me ty të luaj
Në kët' moshë serioziteti
Të vazhdoj ç'ka s'kam mbaruar
Në kët' ëndërr prej vërteti...

Lindur ne qytetin e Korces ne 30 korrik 1957. Pas mbarimit te gjimnazit, perfundoi studimet e larta ne U.T ne Fakultetin Ekonomik. Qysh ne tetevjecare dhe vazhdim, eshte marre me krijimtari letrare,nje pjese e se ciles eshte botuar ne shtypin e kohes.
Mes ngjarjeve tragjike te 1997-es, largohet familjarisht ne Selanik te Greqise, ku ende vazhdon te jetoje. Botoi librin e pare me kujtime e shkrime te ndryshme, "E megjithate jetojme!", ne vitin 2006. Ka botuar shume poezi ne gazetat shqip ne Greqi, si Gazeta e Athines E ALBANIA PRESS, dhe ne forumet shqiptare ne internet. Eshte anetar i Lidhjes se Krijuesve Shqiptare, "Dega e Blerte" ne Selanik. Ne prill 2008 botoi librin e pare me poezi, "Diku, Dike, Dikush" dhe ka per botim librin e dyte po me poezi. Nderkohe eshte ne mes punes krijuese per romanin e tij te pare me ngjarje familjesh korcare ne periudhen kohore 1944 deri ne fillim te viteve '90-te.

Vetvetja

As vetë s'kuptoj si ikën vetvetja
Mundohem ta ndal, por tutje vrapon
As vetë s'kuptoj, ku isha, nga erdha
Dhe vdekjen që pret, akoma s'kuptoj!

Ja ku më thërret vetvetja nga larg
Si dashnore syrin ç'ma shkel
Me mua e ka, i pëlqeka me plak
Dhe mua e uruara më pëlqen!

Ah ç'po më bën të vet'harrohem
Mos ndjej mish e kockë në trup
As moshën mos ndjej si madhohet
Mos ndjej as fillim dhe as fund!

Ku vanë?

Ku vanë miqtë realë?
U zhdukën nga syt' këmbët
E di që janë gjallë
Por gjallje s'kan' në zemër!

Ç'u bënë miqtë realë
Ç'Bermudhë i përpiu?
Të mbyllur në guackë
Me mikroshpirt njeriu!

Ç'u bënë miqtë realë
Në ç'botë vallë enden?
Pa formë dhe përmasë
Pa genin e vetvetes!

Oh sa vështirë t'i gjej
Mes botës kaotike
Sa pranë që i ndjej
Sa larg qenkan në ikje!

Alergji

Alergji nuk kam për mjekrën
Se dhe vetë mjekër mbaj
Alergji kam për gënjeshtrën
Kur qulloset brenda saj.

Alergji nuk kam për priftin
Prift dhe unë mund të isha
Alergji kam për mashtrimin
Që shpesh psalltet nëpër kisha.

Alergji nuk kam për luksin
Jetë luksi kam provuar
Alergji kam veç për priftin
Fukara të pasuruar.

Alergji nuk kam për fenë
Siç e predikoi Krishti
Po për ta që vila ngrenë
Mjekëroshë me rasë prifti!